சரியும் ரூபாய் மதிப்பு… உயரும் கார், டிவி விலை…

Share:
அமெரிக்க டாலருக்கு நிகரான இந்திய ரூபாயின் மதிப்பு கடந்த சில மாதங்களில் ரூ.69.1 வரை சரிவைக் கண்டுவிட்டது.
ரூபாயின் மதிப்பு நலிவடைவதால் உள்நாட்டு நிறுவனங்களின் ஏற்றுமதி செலவு அதிகரிக்கிறது.



அந்நியச் செலாவணிக்கு நிகரான இந்திய ரூபாய் மதிப்பு வீழ்ச்சி காண்பதால் டிவி,கார் உற்பத்தி நிறுவனங்கள் அவற்றின் விலையை உயர்த்தும் நிலைக்குத் தள்ளப்பட்டுள்ளன. 

cars, tvs may get pricier on rupee pains
வீழ்ச்சியும் பின்னணியும்: அண்மையில் நூற்றுக்கணக்கான பொருட்களுக்கு ஜிஎஸ்டி விகிதம் குறைக்கப்பட்டுள்ளது. ஆனால், அதனால் கிடைக்கும் ஆதாயத்தை எட்டாக்கனியாக மாற்றும் வகையில் ரூபாய் பதிப்பு வீழ்ச்சி தொடர்கிறது. 
உலக நாடுகள் பலவற்றுக்கு எதிராக அமெரிக்க வர்த்தகப் போரைத் தொடங்கியுள்ளதன் எதிரொலியாக அமெரிக்க டாலருக்கு நிகரான இந்திய ரூபாயின் மதிப்பு கடந்த சில மாதங்களில் ரூ.69.1 வரை சரிவைக் கண்டுவிட்டது. ஆசியாவிலேயே அந்நியச் செலாவணிக்கு மிகவும் மோசமான மதிப்பை பெறுவது இந்திய ரூபாய்தான். ஆனால் சூழலை மதிப்பிடும் போது இந்த நிலை மேலும் தொடரும் என்றுதான் கணிக்கப்படுகிறது. 

ரூபாயின் மதிப்பு நலிவடைவதால் உள்நாட்டு நிறுவனங்களின் தயாரிப்புகளை வெளிநாடுகளுக்கு ஏற்றுமதி செய்வதற்கான செலவு அதிகரிக்கிறது. இதனால் கார் மற்றும் டிவி தயாரிப்பு நிறுவனங்கள் சிக்கலைச் சந்திக்கின்றன.
கார் விலை உயர்வு: இந்தப் பிரச்னை குறித்து மாருதி சுசுகி கார் நிறுவனத்தின் மூத்த அதிகாரி ஆர்.எஸ்.கால்சியிடம் கேட்டபோது, “எங்களது நிறுவனம் ரூபாய் மதிப்பு வீழ்ச்சியின் தாக்கத்தை உணர்கிறோம். நிலையைச் சமாளிக்க விலையில் மாற்றம் செய்ய வாய்ப்புள்ளது” என்று கூறியுள்ளார். 

உள்நாட்டிலேயே தாயாரிக்கப்படும் பெரும்பாலான உதிரி பாகங்களைக் கொண்டு கார் உற்பத்தி செய்யும் நாட்டின் மிகப்பெரிய கார் உற்பத்தி நிறுவனம் மாருதி சுசுகி. இருப்பினும், மின் பொருட்கள், இஞ்ஜின் மற்றும் டிராஸ்மிஷன் பாகங்கள் போன்ற பல பாகங்களை வெளிநாட்டிலிருந்து இறக்குமதி செய்ய வேண்டிய நிலை உள்ளது. ஜப்பானைச் சேர்ந்த சுசுகி நிறுவனத்திடமிருந்து பெறும் சில பாகங்களுக்கான காப்புரிமை தொகையை வழங்க வேண்டியதும் அந்நிறுவனத்துக்கு கூடுதல் சுமையாக உள்ளது. 

மற்றொரு பெரிய கார் நிறுவனமான டொயோட்டா இந்திய ரூபாய் மதிப்பில் ஏற்படும் மாற்றங்களை உற்று கவனித்து வருவதாகவும் விநியோகஸ்தர்களுடன் அடுத்த ஒப்பந்தம் செய்வதற்கான நேரம் வரும்போது விலையில் மாற்றம் செய்வது பற்றி பரிசீலிப்போம் என்றும் தெரிவித்துள்ளது. இப்போதைக்கு விலையை மாற்றும் திட்டம் இல்லை என்றும் அந்நிறுவனம் குறிப்பிட்டிருக்கிறது. 

“குறைந்த அளவிலான முதலீடுகள், அதிகமான இறக்குமதி செலவு, பண வீக்கம் உயர்வு ஆகியவை நிறுவனங்களுக்கு மட்டுமின்றி வாடிக்கையாளர்களுக்கும் சுமை ஏற்றுவதாகிறது” என்று மெர்சிடிஸ் பென்ஸ் சொகுசு கார் நிறுவனத்தின் தலைவர் ரோலண்ட் ஃபோல்கெர் தெரிவித்துள்ளார். “அந்நியச் செலாவணி மதிப்பில் ஏற்படும் மாற்றத்தை கவனித்து வருகிறோம். தேவையான நேரத்தில் உரிய நடவடிக்கை எடுப்போம்” என்றும் அவர் கூறுகிறார். 

ஆடி சொகுசுக் கார் நிறுவனத்தின் தலைவர் ராஹில் அன்சாரி, “ரூபாய் மதிப்பு பலவீனமடைவது நீடித்தால் எங்களால் விலையை உயர்த்தாமல் இருக்க முடியாது.” என்று தெரிவித்திருக்கிறார். 

டிவி விலை உயர்வு: இந்த நிலை சீரடையாவிட்டால் அடுத்த மாதம் முதல் விலையை உயர்த்த சில டிவி தயாரிப்பு நிறுவனங்கள் திட்டமிட்டுள்ளதாக தகவல் கிடைத்துள்ளது. “இந்த நிலையே நீடிக்குமானால் சமாளிப்பது மிகவும் கடினமாகிவிடும். ஆகஸ்ட் முதல் வாரத்தில் விலை உயர்த்தப்படலாம். குறிப்பாக, 32 இன்ச் டிவியின் விலை அதிகரிக்க வாய்ப்புள்ளது.” என்று பானாசோனிக் நிறுவனத்தின் தலைவர் மனிஷ் சர்மா கருதுகிறார். 

இது தொடர்பாக சோனி நிறுவன அதிகாரிகளை கருத்து கேட்டபோது அவர்களும் ரூபாய் மதிப்பு வீழ்ச்சி ஒரு முக்கிய பிரச்னையாக உள்ளதாகவே தெரிவித்தனர். இப்போதைக்கு நிலைமையை கவனித்து வருவதாக அந்நிறுவனத்தின் விற்பனைப் பிரிவுத் தலைவர் பத்மநாபன் கூறுகிறார். 

தாம்சன் டிவி நிறுவனம் ஆகஸ்ட் மாதம் முதல் 32 இன்ச் டிவிக்களின் விலையை 15 சதவீதமும் அதற்கு மேற்பட்ட அளவுள்ள டிவிக்களின் விலையை 10 சதவீதமும் உயர்த்த திட்டமிட்டுள்ளதாக அந்நிறுவனத்தின் தலைமை செயல் அதிகாரி அவ்நீத் மார்வா தகவல் தெரிவித்துள்ளார்.